張智霖金句﹕人品好運程好
張智霖（Chilam）及張繼聰「兄弟檔」演出賀歲片《家有囍事2020》，拍住上放笑彈，阿聰形容今次與台前幕後合作愉快，談起當初接拍該片，直言事前有跟Chilam「互通消息」﹕「佢拍我先拍嘅。之前有同佢合作過，但好少對手戲，今次之後我發現外表斯文嘅Chilam，演喜劇有佢嘅一套，尤其佢被欺騙『網戀』細細粒（陳嘉佳）嗰場，我直頭笑到肚攣。」
鼠年將至，二人只想身體健康，談到生肖風水命理，阿聰即謂：「我冇理運程，覺得只要保持心境愉快，無論人生起跌都係風景嚟啫，反而有時喺跌嘅時候，先有學習及得着嘅地方。」Chilam則創金句：「我信『人品好自然運程好』。我就慣咗年卅晚一家大細去維園行花市，舊年太多人想中途走，結果畀太太拉住，希望今年成功克服人群恐懼症。」