馬國明加冕吹喇叭

馬國明打破宿命做視帝,宣布得獎一刻繼續「天然呆」,他受訪時笑說:「因為冇諗過攞獎,今年對手好強,見黑哥(姜皓文)喺度,以為係佢攞,仲有陳山聰、袁偉豪,之前反而諗《白色強人》攞最佳劇集。(會唔會戒『天然呆』?)今晚都係少少啫,唔係好呆。」提到宣布賽果時現場反應熱烈,他說:「實在好多人好錫自己。(覺得視帝呢個獎等得太耐?)聽到丹爺話等攞獎等咗52年,自己真係小巫見大巫。自己有提名都係12年左右,有機會攞應該係《On Call 36小時》開始,都係等咗6、7年,可能做醫生特別旺我,對我嚟講唔算好耐,算係好幸運。」

完成訪問後,他即到電視城外與數十名粉絲慶祝,獲贈皇冠「加持」,又開香檳「吹喇叭」慶祝,相當盡興!