李施嬅望登視后:我仲係「親生女」

今年台慶頒獎禮「視后」之爭激烈,最微妙是三位大熱門李施嬅、惠英紅與楊千嬅皆與無綫沒有經理人合約關係,沒有「親屬」優勢下更加勢均力敵。李施嬅雖已離巢,但自覺無綫出身,永遠都是「親生女」,直言如果得獎自然更圓滿!

入行16年的李施嬅憑人氣劇《金宵大廈》一人分飾兩角Alex及Coco的精湛演出,獲網民封為「民間視后」,在本月12日舉行的《萬千星輝頒獎典禮2019》有望再下一城,與影后惠英紅、楊千嬅力爭「視后」寶座。李施嬅受訪時直言因觀眾支持令她有信心攞獎,由過往陪跑到有機會問鼎,覺得像奇迹一樣。她笑說:「我連『飛躍進步獎』飛咗五年都飛唔起,以前點敢諗攞視后?離開TVB我已經對獎項放低咗!《金》係2019年一個奇迹,我好似發緊夢咁。提名年年有,但今年係最有信心、機會最大嘅一年,但對手亦都係最強。」

李施嬅對「民間視后」稱號感到很有愛,但不認為如外間所指無綫欠她一個獎,她說:「唔覺得TVB欠咗我任何嘢,我有嘅嘢都係TVB畀我。」今年視后大熱皆非「親生女」,令戰況更激烈,她說:「未試過女主角熱門都唔係『親生女』。不過,我覺得我係『親生女』,因為我喺TVB出世,依家只係離鄉別井去咗外地工作啫!呢度係我屋企,如果得到爹哋、媽咪認同畀呢個獎我,對我嘅演藝生涯嚟講係一件圓滿嘅事。」講到「視后」兩大勁敵惠英紅及楊千嬅,她形容二人是神一般的對手,謙稱演技不能跟她們相提並論,而自己唯一優勢是一人分飾兩角,發揮較大。

擔正加拿大新劇

曾在歐美憑微電影獲封雙料影后,李施嬅去年再憑加拿大劇集《血與水》第三季競逐有「加拿大奧斯卡」之稱的《2019年加拿大銀幕獎》女配角獎,燃起她心中團火、信心大增。她透露已落實在2月底開拍新一季,更「升呢」孭飛做主角:「拍咗差唔多30套劇,係第一次自己個名行先,覺得好榮幸。」

場地:Hyatt Centric

服裝:J'Sister