陳柏宇「揸水」遭粉絲突擊
歌手陳柏宇（Jason）昨日出席「V Walk x 陳柏宇Selfie派對」，吸引半百粉絲撐場。Jason即場獻唱之餘，又與粉絲玩夾氣球及拖手包禮物遊戲。
講到被集郵經歷，Jason笑言有兩段難忘回憶：「有次我架車離開停車場時，有個粉絲追住架車拍門，叫我影合照。我即時鬧咗佢先，因為太危險，但最後都有同佢影合照。另外試過喺廁所入面被要求影合照，我就話，不如離開咗個廁所先影！（依家囡囡變成你嘅集郵對象？）梗係！不過佢唔識企定定影相，我要捕捉佢。」
期待賣甩老婆親子樂
Jason透露太太最近帶同1歲多的女兒到外地旅行，但他因工作未能同行，惟有每日與囡囡視像通話：「佢拎住個電話唔識用，有時只見到佢個額頭，又見佢不停錫個電話。（佢掛住你？）我唔知，希望佢有啦！」他笑言期待下次太太獨自飛外地，屆時他就可以獨佔女兒。問到會否想兩父女去旅行？他說：「得，實得！但有冇必要咁做呢？最麻煩係怕佢整親同唔識聽指令，不過唔會扭計扭得好犀利。」
