神劇《來自星星的你》編劇朴智恩執筆嘅新劇《愛的迫降》，由緋聞男女玄彬同孫藝珍合作，今個星期六首播。尋日公開新海報造勢，孫藝珍着住件低胸紅裙騷事業線，原本好養眼，但唔少網民話熟口熟面，原來同《星星》九成似，連女配角徐智慧嘅髮型同衣着都抄足「千頌伊」，有網民勁踩海報造型老土，好似仲停留喺六年前嘅《星星》年代。