陳凱彤自由創作驚到爆眼瘡
歌手陳凱彤（Lillian）去年完約離開英皇，轉投新公司，繼推出兩首國語歌後，現連續推出廣東歌《不掃不快》及《冷處理》，將於月尾舉行小型音樂會，她坦言很感恩。新公司給她很大自由度，然而難免有壓力：「可能以前受保護得太好，令我一出嚟有少少驚，未試過一個人管理晒MV，不過變相畀咗動力我，學識好多嘢。」她透露準備拍《冷》MV時很大壓力，臨出發前更左右眼輪流生眼瘡，令她十分擔心。
《冷》由Lillian作曲，乃三年前失戀所寫：「講一段關係已經你唔理我唔理，但仍然喺埋一齊，距離好遠。」她坦言是親身經歷，對方是圈外人，可能與當時她入行有關：「我畀唔到安全感佢，感情又淡咗，大家唔理對方所以就分開。（拖拉咗幾耐？）其實係幾個星期嘅事，因為我飛咗去做嘢，好少搵佢，到返嚟時就散咗，之後都冇再搵過對方，佢同我散咗一年之後就結婚。」
最多減過80磅
現年26歲的她感情生活空白，問到恨不恨拍拖？她說：「有機會嘅話可以試，但依家都想專心做嘢先。（屋企人會唔會催你？）有一次同屋企人傾，我話『唉，我都係唔拍拖啦』，爸爸即刻話『唔得，呢個係終生嘅事，唔可以唔諗』，不過都係順其自然啦。」
Lillian本是肥妹仔，入行後一直努力減肥，一度減了80磅，間中略有反彈，不過她會努力不懈。說到早前減到差點走火入魔，她說：「我覺得最緊要係個人嘅精神，如果咁嚴厲去減，對做嘢都有影響。」
場地：五勺