黎耀祥好人難做奸得有層次
視帝黎耀祥演出的內地古裝劇《鳳弈》在無綫播出，戲中他飾演囂張高官予人奸角感覺，他直言從不介意是否男一，最緊要是有戲發揮，更笑指「好人難做」，較享受做古怪、複雜的角色。
黎耀祥對上一套無綫劇已是年半前的《逆緣》，他拍攝的內地古裝劇《鳳弈》正在港播映，直言編審是合作過《西遊記》、《巾幗梟雄》系列的張華標，默契十足，因此二話不說便接拍。
曾奪三屆視帝的黎耀祥對演技仍有所追求，希望接演多層次甚至古怪角色，直言近年多被安排做正直好人，笑言「好人難做」，怕會做到厭：「主角好少可以做離經叛道嘅事，我好怕又係做好男人，有個好老婆好家庭，咁咪即係做自己？我希望有啲新衝擊，客串都好，所以我成日叫監製唔好搵我做好人，好似『柴九』係小人物，會有情緒，做角色最緊要有人性。」
《鳳》劇中黎耀祥飾演表面上囂張跋扈的中侍郎朗坤，角色複雜有層次，即使是男二也樂意接拍，事實上其神級演技成功搶晒鏡！講到戲中與皇后有一段微妙感情，他直言相當特別：「皇后同官注定唔可以一齊，只可以互相守護，呢份感情現今世代係冇，你唔可以佔有佢，但依然不離不棄，係好昇華嘅感情。」
為香港版本配音
鮮有返內地拍劇的黎耀祥表示其中一個挑戰是熟讀普通話古文對白，雖然有後製配音，但祥仔仍堅持現場說普通話：「我希望同其他人同一語言，唔想抽離咗，所以準備工夫多好多，壓力好大。」對於佘詩曼拍《延禧攻略》時一招「廣普交替」，黎耀祥笑言非常犀利：「呢招勁呀！但我覺得要轉Channel仲難！」他親自為TVB版本配音，令觀眾更有親切感：「自己演繹番會更細緻，有時講嘢尾音、語氣可以交代唔同意思。」