吳若希老公炒車 囡囡嚇親大喊

吳若希透露老公日前送囡囡返學撞車，幸好人冇事。

吳若希前晚到電視城出席《娛樂大家》錄影，透露其夫大前日早上送囡囡上學期間發生交通意外：「佢話前面架車急停，佢Dup唔切撞咗上去，前面架車已撞人車尾，老公再撞上去，搞到三車相撞。囡囡仲嚇到喊，好彩兩個都冇大礙。我聽到電話都嚇親，最緊要係人冇事，錢財身外物，人冇咗就冇咗。」發生意外後，當日囡囡沒有上學，翌日搭公共交通工具如常返學。

唔會鬧老公

由於車有損毀，Jinny笑言已經準備買新車：「都急住用，可能呢兩日要買番架車，原本都諗住買新車嘅，所以我覺得老公係特登嘅，知我想換車。（換新車會唔會唔畀老公揸車？）盡量我揸啦，或者請司機。」她表示計劃買家庭車，正四處（R）折頭。記者笑言大可叫老闆送車，她說：「邊個老闆？個女就係我老闆，Herman（何哲圖）已經變咗做屋企人，不過佢好關心，打咗三次電話嚟，叫我安慰佢哋，同埋唔好鬧老公，我冇鬧，仲鬧咩呀！」

放大圖片	劉佩玥咁易畀男仔呃，似乎太單純。

劉佩玥畀仔呃

同場的劉佩玥（Moon）第二次上節目玩，要一雪上次玩「狼人殺」的前恥，表示自己不夠隱藏，甚麼都表現出來。問到可試過呃男仔或被男仔呃？Moon笑言不用呃男仔，感情事要坦坦白白，但試過被男仔呃：「有個追求者，有次我唔知佢去咗邊，佢話瞓咗70幾個鐘頭覺，我以為佢攰啦，同媽咪講，媽咪話我真傻定扮懵，定係好鍾意對方！諗深一層，佢係存心欺騙，所以唔考慮同佢一齊。（緋聞男友周志文有冇呃你？）我同佢好朋友，佢冇必要呃我。」