黃祥興斷鎖骨急開刀
41歲藝人黃祥興向來Keep住做運動，身形健碩Fit爆，怎料前晚在停車場準備取車返家期間，不慎仆倒，右膊撞落地，當時感到少許痛楚，以為只是脫骹，掉以輕心，但之後再Chok幾下就更加痛，遂入院求診，照X光後證實右邊鎖骨斷裂，日內要開刀做手術，鑲螺絲和鐵片固定鎖骨位置，令其更快愈合。
擔心大肚老婆
祥興昨日上載在醫院臥床的相片，自嘲唔係「18、22」，隨後再晒出一張X光片，透露跌斷鎖骨，留言：「想問大家斷咗鎖骨，應該做手術定係等佢慢慢康復？」王浩信、黃翠如、陳敏之和陳山聰紛紛留言祝他早日康復。祥興接受電話訪問時稱：「自己唔小心啦！其實可以由佢慢慢好嘅。（家人擔心？）我擔心佢哋就真，我要照顧大肚嘅老婆同接小朋友返、放學，依家傷咗做唔到，所以都係想盡快好番，聽醫生講做手術囉！（停工？）呢排未有工作，希望下星期可以好番，唔使大肚老婆咁辛苦！」