馮盈盈隱藏天籟之音 保張頴康飯碗

無綫劇集《解決師》演員王浩信、馮盈盈及張頴康等，前晚擔任《流行經典50年》嘉賓，馮盈盈為獨唱《幾分傷心幾分痴》的張頴康伴舞，未有晒歌喉的她對着張頴康笑說：「我嘅歌聲好神秘，係天籟之音，好好聽，我都係為你好咋，我驚唱完後你冇嘢撈！（驚爆咪？）真係有收音嘅同事講過，話我激動、開聲嘅時候唔該通知一聲，唔係驚有工傷！」

貪玩手多多

盈盈笑指已拉筋熱身，準備伴舞，誓以勁歌熱舞征服全場。問到劇中與張頴康火辣激情，台上會否撫摸拍檔？她笑說：「本來我想加插少少個人化嘅感性演繹，加少少肢體接觸，但係綵排畀導演開咪，叫我唔好咁似Dancer，但係我今日唔係嚟做Dancer咩？」

張頴康努力練歌，笑指有盈盈同台會更有信心，但取笑她走來走去，似鬼影幢幢，又說：「自己對唱歌信心唔夠，如果得我一個人喺台上面，大家會集中聽我唱歌，如果有盈盈喺度行嚟行去，可以分散注意力！」盈盈笑說：「我有提議佢揀輕快嘅歌，好似《皆大歡喜》，咁我都易啲伴舞，依家呢首歌真係好難做！」

莊思敏性感上陣。	張頴康（左）及王浩信都有獻唱，唯獨盈盈保持「神秘感」。	劇中與張頴康肉搏的盈盈上載新相，外搭上衣遮事業線，驚男友嬲豬？

王浩信儲歌𢱑出碟

至於王浩信選唱《至少還有你》及《到此為止》，他笑說：「唱女仔歌好啲，唱得唔好冇咁明顯。」又指已唱過六、七首劇集歌，儲夠十首就可以跟公司商量出碟。提到太太陳自瑤在網上晒泳照騷身材，可有被嚇親？他笑說：「我畀咗個讚，咁又冇嚇親。」