利嘉兒太愛個女反被虐待

藝人利嘉兒(Lily)婚後奮戰八年,曾經歷兩次流產,直至去年終於得償所願,誕下愛女劉書雅(Karyssa),她憶述第一眼望見女兒的情景:「記得麻醉完醒咗後,護士抱BB嚟見吓我,睇完第一個反應係:『嘩!呢個邊個嚟o架?塊面真係肥到好似蠟筆小新!』直到今時今日,佢個面豬墩都仲係好勁,個個見佢都好肉緊,話要錫佢塊面。」

沖涼狂抓 全家傷痕纍纍

排除萬難、幾經痛楚才擁有愛情結晶品,Lily對女兒自然疼愛有加,44歲才成為新手媽咪,笑言一下子變為緊張大師:「頭兩個月可能賀爾蒙影響,情緒有少少波動,同時因為太愛佢,好多嘢開始擔心,好似擔心佢長大會點、驚佢受傷,或者對自己好冇信心,成日驚照顧唔到佢,或者未能提供最好嘅畀囡囡!」

Karyssa出世初兩個月,對水極度恐懼及抗拒沖涼,令到Lily十分頭痛:「一沖涼就不停喊同嗌,好怕沖涼!後來逐漸有進步咗,佢冇喊得咁淒厲,初初頭一個月,隔籬屋成日以為我虐待兒童,其實係我畀佢虐待至真!因為小朋友啲指甲好尖,佢一扭計就抓到我損晒,全家人都傷痕纍纍!」