陳曉華蜜會狄以達翻撻斷正

即將卸任的港姐冠軍陳曉華(Hera)自去年4月與有「女神殺手」之稱的歌手狄以達分手後,最近被爆秘密翻撻!有讀者報料前晚在九龍灣一間餐廳撞見他們撐枱腳,並不避嫌穿上情侶運動裝,全程Hera冧爆男方,食到餐廳打烊才捨得埋單離開。

現年24歲的陳曉華參選港姐期間,被踢爆在中文大學修讀護理課程時,曾與狄以達拍拖,更指女方因而狠飛拍拖兩年的男同學,狄以達被指是第三者。事後Hera否認狄以達介入,強調與男友分手後才與對方開始,不過兩人戀情僅維持一年便玩完,但有指她對狄以達一直未能忘情,入行後希望有機會合作,愛火重燃。昨日有讀者爆料,同樣是單身的他們終於復合成功,還甜蜜撐枱腳。

冧爆望到實

前晚大約8時多,Hera一身運動裝打扮現身九龍灣Mega Box一間西餐廳,雖然刻意戴上白色Cap帽,不過身高5呎9吋的她,很快就被人認出。未幾,同樣穿着運動裝束的狄以達前來,兩人完全不避嫌以情侶裝示人。由於餐廳燈光昏暗,見他們都吃得相當自在,特別是Hera不時笑望男方,樣子非常冧爆!至於狄以達都很有男士風度,頻頻為女友添食物,又講笑話逗大家開心,他除了一身超凡舞藝,睇得出冧女也很耍家,難怪前女友全部「高汁」!結果他們食足兩小時,直至餐廳Last Order後,才捨得揚手埋單。不過,離開餐廳時狄以達刻意殿後,讓高人一等的Hera行先,當等電梯時情不自禁行埋,期間有途人眼望望,Hera表現大方若無其事,反而狄以達避忌耷低頭,幸好不久即有電梯,他亦非常細心護着女友入內。

尷尬講「復合」

昨日本報就翻撻一事向狄以達求證,他似有心理準備,不停笑住回應:「我都諗到喇!食個飯啫!我都好耐冇出街食飯。(係咪同陳曉華復合?)真係食個飯咋!我哋都好耐冇聯絡。(邊個約出嚟食飯?)共同朋友約,我哋有個Group。(係咪想追番佢?)冇諗咁多,純粹食飯咋!」提到當晚表現避忌?他說:「唔係呀!我嗰晚喺TVB做完嘢過去,最遲先到。」再追問他有否機會翻撻?他未有否定,只尷尬地笑着說:「呢啲嘢好難講,我唔講得咁死。」至於Hera答法亦同男方一致:「我哋其中一個朋友啱啱返嚟香港,所以一齊食飯敍舊。」問到狄以達再追她會否接受?她只說:「目前專心工作比較好,唔會考慮其他嘢啦!」

第一手消息請下載on.cc東網iPhone/iPad/Android/