88磅陳熙蕊狂食似放監
《2019香港小姐競選》15名候選佳麗，昨日分批到東京築地、表參道和自由之丘取景拍攝。表參道屬名店朝聖區，一班佳麗拍攝行街鏡頭，有得睇冇得買，認真「吊癮」！楊慧敏和姚羽嘉被問到行程緊密只可以Window Shopping可有不開心？她們都明白今次是來拍攝和學嘢，絕不會不開心。
直至下午，佳麗跟旅遊節目主持周奕瑋到築地，周奕瑋見識到她們狂食似放監，更大讚陳熙蕊食相最出眾，對於她們毫無包袱深表佩服：「食得好黐線，仲黐過我呀！當中最勁係陳熙蕊同廖倬竩！」廖倬竩說：「我都唔想係最為食嗰個，但冇辦法，雖然要減肥，但一係唔食，一食就唔會忍口！（可覺自己係肥妹？）我都係正常Size女仔啫！」
日食五餐
至於身形纖瘦只得88磅的陳熙蕊說：「我係好鍾意食嘢，好似刺身啦，真係好好食！我全部食晒！仲要多謝周奕瑋畀好多貼士，佢叫我將自己最真嘅一面呈現出嚟！（食極唔肥有冇人妒忌？）又冇，只係話我成日搞到佢哋都想食嘢啫！其實我嘅磅數一路差不多，我食好多嘢，最誇可以一日五餐，早、午、晚、下午茶同消夜，尋晚我返酒店房仲有食消夜，食咗麵包、蘋果同餅乾，因為肚餓係瞓唔着，所以要食飽，我仲喺香港帶埋麵包過嚟隨時醫肚！」
特派記者陳永峯日本報道