馮盈盈「點」到即嫁話生就生
藝人馮盈盈與麥明詩（Louisa）合作主持節目成好友，拍攝時肉帛相見令感情昇華，Louisa笑指二人身材相若未見「突出」，切忌「傷口上灑鹽」，而盈盈為求收視達標，竟出口術承諾宣布結婚生仔！
盈盈與Louisa昨午現身電視城宣傳旅遊節目《荷蘭好玩》，一向語出驚人的盈盈笑言倘若收視過40點便宣布結婚、過50點就宣布生B。Louisa更搞笑謂只要50點就會瞓身買無綫股票，令旁人起哄。
「唔敢得罪佢嘅粉絲」
事後二人孖住受訪，盈盈坦言節目安排於周日播放，加上近日社會氣氛，對收視或有一定影響。Louisa則說：「其實輪唔到我哋擔心，每個人做好本分就得。」至於被網民投訴在《荷》中經常「黑面」，她解釋是「劇本設定」：「應監製要求我窒吓盈盈嘛，私底下我唔敢得罪佢嘅粉絲。」
肉帛相見唔會比身材
盈盈自爆二人為拍節目肉帛相見，曾於同一廁所換衫。問到會否尷尬？Louisa笑說：「冇喎！亦冇互比身材，大家心知係咁上下，唔好喺傷口灑鹽。」而二人今日會齊齊飛日本，會合候選港姐拍攝外景。
另外，Louisa被問到身為教師的爸爸榮休，她說：「屋企個個要返工，佢冇人陪都搵啲嘢做吓，暫時幫佢租地方開補習班。屋企啱啱買咗樓，經濟壓力都大，佢要辛苦啲幫手搵錢。（傳你哋買咗3層喎！）屋企嘅私隱喎，唔講喇！」