Aka久疏戰陣血染芭蕾舞鞋
女子組合Super Girls隊長Aka早前為新歌《生來起舞》拍攝MV，歌曲故事正是她自小學習芭蕾舞跌低再站起的親身經歷，MV中她亦換上芭蕾舞衣，並邀請兒時一起習舞的好友，施展八級舞藝。
Aka說︰「導演話好想睇到我跳芭蕾舞，讚我跳得好靚，但入行後已甚少跳，事前都要花時間Pick Up番，對我嚟講有少少吃力，畢竟依家冇十幾歲時筋骨咁軟，郁得冇咁靈活。」結果她練習時擦傷腳：「冇咗皮得肉，血染到隻鞋紅色，自己都覺得有啲核突，拍攝時係頂硬上，貼咗好多塊膠布，好在跳緊時好專注，唔係覺得好痛。」
氣餒諗過轉行
她希望透過歌曲鼓勵大家遇到失敗不要放棄，又坦言剛入行時聽過不少難聽的說話，曾氣餒想過轉行︰「好努力去做好多嘢，你覺得呢個作品大家可能會好欣賞你嘅努力，但原來大眾未必咁容易接受，或者咁受歡迎，點都會有啲沮喪。」她慶幸有家人和朋友的支持，特別媽媽和妹妹給她開解，讓她覺得自己冇走錯路。
