林夏薇押後造人復出自虐
藝人林夏薇於新劇中飾演教授，對白是從演以來最多，還要攀山涉水拍外景，難得瘦蜢蜢的她沒半句怨言，更揚言享受自虐，順利完成拍攝已很有滿足感。休息一年未有停下來，林夏薇把心一橫決定「復出」，暫且把生B一事拋諸腦後。
林夏薇於無綫新劇《十二傳說》演民俗學教授，由於要運用到大量專業用詞、心理學等知識，開拍前除了到書局狂掃有關書籍外，又不停上網搜尋資料。劇中講述的香港傳說讓她看得津津有味，儼如追看小說。
廢校陰風陣陣
談到在新娘潭取景，薇薇直言到該地方前，曾聽過很多恐怖傳聞，令她不寒而慄，可是親歷其境後，才發現該處山明水秀：「唔知香港有個咁靚地方。拍呢套劇去咗好多地方，仲要去號稱亞洲十大恐怖學校之一嘅地點拍攝，拍時多數半夜，成班Crew氣氛異常嚴肅，大家都會感覺到啲嘢，但就要睇各人點樣理解，好似有次拜神時有陣怪風，吹熄晒啲蠟燭，當時大家互望冇出聲，後來再點香拜過。（有冇符喺身？）有袋平安符喺銀包度，好在都叫順利。」
談到與蕭正楠繼《公公出宮》後再合作，薇薇表示與好友一起開工，很有互相扶持感覺：「呢套劇大家都辛苦，所有地方要攀山涉水，我要上到石頂，又半夜坐船，新娘潭又要去潭底，真係體力、腦力都要勞動，因為太多對白。（最辛苦呢套？）算係，但我好鍾意拍劇，享受受虐。」
陪老公四圍飛
該劇是她約滿無綫前最後一套作品，薇薇笑指後悔之前表示為生B而停下來，因這一年所謂休息，卻不停陪老公四圍飛，自己生意也親力親為，故生B一事還未能付諸行動。與其一樣忙，倒不如「復出」幕前：「冇計啦！所謂休息其實係多咗時間做自己想做嘅嘢，同埋跟住老公開會學嘢，但最有得着係，身體經過調理係強壯咗。生仔真係未有時間住，咪出番嚟拍吓嘢囉！」
場地：走肉．朋友素食自助餐廳
髮型：Ivan Lee @ Headquarters
化妝：江中平化妝室