Rose Ma被同行轟搵笨

今年有份出寫真的網紅Rose Ma被爆料,指她邀請其他網紅做直播,但做了幾個月一蚊都冇,爆料者又狂數其人品。Rose解釋應是直播平台與她們之間出現誤會,可能她們未達到要求,故沒有收入。

被指與日本AV女優明日花綺羅有幾分相似的網紅Rose Ma(馬俊怡),最近推出到日本取景的個人寫真集,風格比較非一般,並非Sell三點式泳衣或可愛,而是有機械人造型、車手型Look甚至SheShe構思,加上本來有肉地的她拍攝時減磅不少,吸引大批男Fans支持,不過人紅是非多,昨日有讀者爆料力數其劣行。

食早餐冇畀錢

爆料者指近年Rose邀請多位網紅參與直播平台,但做了幾個月,最終一分錢都冇:「佢一開始係咁叫我哋開足鐘數,否則冇收入,我哋都好驚,開到足,但一直冇回報又未簽約,到後期佢先話約食飯出嚟簽約,但第一次佢放咗我哋飛機,之後冇咗件事咁,機都唔應,我哋一班人直播咗幾個月,仲要幫佢宣傳,但一分錢都冇。」又指從Rose的朋友得知,指她讀中學時已多次叫人買早餐但冇畀錢。

了解緊有咩誤會

昨日Rose繼續到書展為寫真舉行簽名會,她解釋「冇錢分」一事可能存在溝通問題,起初是直播平台希望她介紹人參加,於是幫口邀請認識的人,工作性質及報酬一開始亦沒有隱瞞:「可能有啲女仔冇了解過分錢嘅方法,做呢類型直播,係要達到某個觀眾數目同埋收到幾多禮物先有錢,佢哋去唔到要求嘅觀眾數目,我唔知有咩誤會,都了解緊,呢啲嘢好似各執一詞好難回應,所有女仔我都識,當佢哋係朋友先叫大家一齊做。(話你以前呃早餐食?)其他是非嘢都唔想回應喇!」