擁有35E驕人身材的歌手迪子遭家暴，變人肉沙包被胞弟打到血流披面，險毀「人造鼻」，要報警求助急送院，她受訪時哭訴多次被毆的悲慘經歷。
前年在韓國跌傷致毁容的迪子，昨日在社交網灰爆留言：「5月19號3:15am再一次家暴事件發生在我身上，多謝。」之後再發文：「當家人變成都是會傷害你的人，你就會明白，你必須要更堅強。否則，很難繼續生存下去。」
她昨日受訪，憶述在Band房捱了胞弟兩拳，即時面傷兼狂流鼻血，為保人身安全而報警：「我返Band房搞音樂嘢，細佬同三個男仔Friend喺度夾Band，只係隻狗瀨尿咁小事，細佬就發大脾氣，我同佢鬧交，雖然佢啲朋友撳住佢，但都打中我個鼻，當時好痛、好驚，因為我個鼻2月啱啱喺韓國『執』過，歪咗就大件事。」被送到急症室照X光後，幸個鼻夠「堅」，只是面部受傷，紅腫變「豬頭」。
問到可會起訴胞弟傷人？她指母親溺愛胞弟，得知家暴後已情緒激動，擔心弟弟可有打到傷手。她為免再添母親壓力，決定不作起訴，又爆胞弟一向脾氣暴躁：「其實幾年前，媽咪嗰陣破產，屋企連買洗衣機嘅錢都冇，佢仲亂掟爛啲嘢，同佢嘈交時佢用櫈『車』傷我，嗰次有報警，之後離家出走兩年，近幾年關係先好番，依家又係咁。」問到可會原諒胞弟？她哭着說：「暫時唔會，唔想見佢，佢亦冇同我道歉兼聯絡，或者佢唔需要親人。」
迪子並首度公開慘痛往事，指父親曾家暴母親及她，在她就讀5年級時，父親打她後，母親決定離婚，她形容遭親人暴力對待，心靈痛楚大於肉體：「我畀屋企全部男人打過。」