無綫劇集《鐵探》周五播映大結局，這星期劇情相當緊張，惠英紅飾演的Madam Man，不但先後害死兩個仔，殺得性起的她繼續大開殺戒，Bingo（姜皓文飾）和伍Sir（陳志健飾）亦因她而死於亂槍之下。劇中身為惠英紅忠僕的陳志健臨死前終於棄暗投明，而這場「陣亡」戲，惠英紅事前給予他不少貼士，令他相當感動。他說：「紅姐綵排時提醒我中槍倒地嗰刻，記住要將手袖位拉出，否則會磨損手；又提我中槍後，打穿心臟嘅反應係呼吸困難再斷氣。到我中槍倒地後，紅姐仲親手幫我加血漿。其實佢有好多嘢要兼顧，但都有留意到對手每個細微位，所以真係好感謝佢！」