江嘉敏傳執二攤擔正怕觀眾睇厭

藝人黃心穎偷食人夫許志安後一走了之，之前拍下的無綫劇集及工作都要臨急找人重拍及頂替，《法證先鋒IV》的角色由湯洛雯取代，而《牛下女高音》的女一位置則相當有機會由江嘉敏頂替，將於7月重拍。

江嘉敏受訪時坦言未收到通知，問到其檔期是否配合到？她說：「依家拍緊《大醬園》同《降魔的2.0》，7月《大》劇仲未完，到時可能要兩套劇一齊拍。（經常兩劇在手，好旺！）都係好事嚟嘅！希望大家唔好睇我睇到厭啦！」而《牛》劇監製黃偉聲則表示：「其實仲未定，等我呢兩日見埋幾個人先，我都要約埋編審，之後嗰兩、三日見吓啲人先決定到。」

黃心穎避走美國安胎？

至於李佳芯（Ali）昨日出席公開活動，問到可需接替黃心穎的工作？她說：「又冇收到通知，我打後啲劇都係一早計劃好。」正在放假的她又分享早前與高海寧（高Ling）到巴塞隆拿度假：「原本諗住一個人靜靜哋去旅行，後來因為佢喺巴塞有工作，咁我話：『不如我跟你去玩啦！』」Ali提起睇波時更相當興奮：「張飛都要5,000幾蚊，估唔到佢又同我癲，原來佢做過世界盃，都鍾意睇波！」問到此行可有艷遇？她笑說：「留番畀高Ling啦，佢每日都會Dress up（打扮），我係瞓醒唔化妝、唔梳頭就出門口，不過之後都畫番條眉同眼線，有比較唔可以輸得太盡！所以我決定6月開工前撇甩佢，自己再去多次旅行！」

另外，昨日網上瘋傳黃心穎避走美國其實是為了專心安胎，不過有細心的網民發現有關消息原來只是翻炒她去年拍《丫鬟大聯盟》時不適嘔吐傳有喜的報道。