當尹光偶像譚杏藍同台唱圓夢
歌手譚杏藍（小花）昨日出席網上Live騷，期間有網民問她何時與尹光合唱，她即哈哈大笑，事後解釋不少朋友都知她視尹光為偶像：「13、14歲就聽佢啲歌，識背晒啲歌詞，《荷里活有間大酒店》……喺卡拉OK、Party、Annual Dinner都會唱。（Annual Dinner都唱得？）咁梗係自己公司嘅晚宴，但如果有客要求我都唱o架！」小花又指有次到澳門做騷時與偶像同場，朋友特別向對方提及她識唱其歌曲：「尹光真係捉埋我上台唱，圓咗我小粉絲心願。（同佢合作合唱歌？）慢慢啦，等我歌手身份嘅認受性高啲先。」
