張寶兒驚袁偉豪踩「地雷」
藝人張寶兒昨日出席劇集宣傳，男友袁偉豪（Ben）因發燒未能到場，她透露Ben今日出發到哥倫比亞拍節目，雖然當地美女如雲，但她冇有怕，反而擔心男友安全，又為對方收拾行李，果然是廿四孝女友！
藝人楊明、張寶兒、蔡思貝、楊潮凱及謝東閔等昨日現身劇集《鐵探》的快閃行動，在旺角行人天橋上表演唱歌，吸引不少途人圍觀。劇中主角袁偉豪原定出席，但他為拍攝《打工捱世界III》注射防疫針後出現輕微發燒，最終缺席活動。有份與Ben同行的楊明說：「我哋就出發去哥倫比亞拍攝，會逗留18日。尋日醫生話我哋有兩支針未打，Ben打完有少少反應，我就冇事。」他稱已準備大量蚊怕水，希望不會辛苦過上一輯：「上輯有寶兒做嘉賓，今次冇安排女藝人，Ben成個人都係屬於我。當地出名選美同模特兒，我哋會喺當地搵啲靚女做培訓。我就做導師，Ben負責培訓啦！哈哈！」
幫手執行李
當地美女如雲，問寶兒會否擔心？她對男友信心十足：「我唔驚，我係怕佢唔安全，擔心嗰邊治安，佢哋去嘅地方唔係旅遊區，唔知會唔會踩到人哋嘅『地雷』。我有幫佢執行李，帶咗啲即食白飯同粟米湯。」至於楊明女友莊思明就沒有為他執行李，楊明笑說：「佢執我兩巴就有！佢都有叫我小心啲，有買罐頭畀我，但我都攞番出嚟，因為行李有重量限制。」
另外，思貝透露劇集大獲好評，她在劇中所戴的手鏈竟然成為商品。她與楊明在劇中有感情線，但沒有親熱戲，還大爆：「會有啲心噏戲，心情會好似坐過山車咁，仲會有好多人死。」