陳松伶踩中蟻竇成腳水泡冇眼睇
藝人陳松伶昨日出席宣傳活動時，自爆拍劇期間被紅火蟻咬到雙腳起水泡，以及雙眼嚴重發炎，為免老公擔心，她故意隱瞞病情！
陳松伶昨日與拍檔黃智賢、余德丞及江嘉敏等現身紅磡，宣傳無綫熱播劇《福爾摩師奶》，向現場觀眾大派禮物，場面熱鬧。專程返港參與宣傳的松松自爆拍攝的難忘事：「我哋踩咗入紅火蟻地盤，啲紅火蟻喺咁咬我對腳，睇住起水泡，真係好痛！而我雙眼敏感到擘唔開，結果要去睇醫生求助。（老公心痛？）當時唔敢話佢知。」
忙敍舊見朋友
正忙於音樂劇巡演的她透露日內離港：「之後仲會再返嚟一轉嘅。（今次返港忙敍舊？）係呀，呢幾日一日三餐都約咗人，食到好飽，不過食乜冇所謂，都係想見吓朋友。」她又指戲癮大，只要獲邀便會歸隊。
江嘉敏拍床戲尷尬
至於余德丞與江嘉敏孖住受訪，二人於戲中與陳瀅發展一段三角關係，江嘉敏自嘲「執二攤」﹕「余德丞鍾意女神陳瀅，但被對方拒絕先同我一齊。劇情峰迴路轉，嚟緊我同陳瀅有激烈床戲，兩個女仔黐到咁埋講對白，有啲尷尬。」余德丞則稱有機會一親陳瀅香澤，江嘉敏即踢爆：「佢話陳瀅好咀呀！」男方即反駁：「唔好亂講，不過陳瀅個唇幾豐厚，係好錫嘅。（唔怕緋聞女友蔡思貝呷醋？）我同佢合作綜藝節目，如果要咁（拍咀戲）會動用好多人力物力。角色需要嘅話，咀男仔都要啦。」