魔童齋黐老竇張智霖靚靚被冷落冇癮
藝人張智霖與袁詠儀日前帶囝囝出巡中環享家庭樂，12歲的魔童已長得高過爸爸的膊頭，兩仔爺邊行邊傾，完全無視媽咪。觸覺敏銳的魔童，即使發現記者在場依然淡定望鏡任影，甚有「星二代」風範！
圈中恩愛夫妻張智霖（Chilam）與袁詠儀（靚靚）早前結婚18周年，趁農曆新年帶囝囝張慕童（魔童）外遊慶祝，魔童遺傳了父母的優良基因，拍埋Chilam身邊，已高過他的膊頭，而且外表俊俏，不過活潑好動的他，身形卻相當「排骨」。
速買外賣
日前晚上7時許，一家三口出巡中環，期間於商場內「搵食」，囝囝選擇食漢堡包、薯條等，兩公婆見餐廳多人，於是極速買外賣，未幾靚靚與魔童各拿着一袋外賣離開。沿途魔童只顧黐住Chilam，兩父子邊行邊傾，未有理會身旁的靚靚，當魔童發現有記者在場，即望向鏡頭，還發揮其「星二代」風範，點點頭打招呼，然後繼續與爸爸密密斟。
一家三口其後往取車，被冷落的靚靚原本一直木無表情，但見到代客泊車員上前招呼時，即笑笑口與對方吹水，而Chilam亦豪爽地拿出兩張「紅衫魚」給兩名泊車員，之後駕車返歸。