張家輝交友冇是但 難得擋子彈
影帝張家輝於主演的英皇電影《廉政風雲 煙幕》中，有出生入死的好兄弟，不愛應酬的他現實生活中亦同樣覓得知己良朋，教人羨慕！他笑言經理人鍾珍可以為他「擋子彈」，而「阿哥」張學友的做人處事態度，更是其人生借鏡。
張家輝於戲中有好兄弟袁富華出生入死，然而現實生活中，自認宅男的他身邊好友卻寥寥可數，幸而約4、5年前簽約經理人鍾珍旗下，二人關係亦師亦友。家輝笑指鍾珍可算女中豪傑：「佢有時有『雷』過啲男人添，相信如果真係要幫我擋子彈嘅話，佢會係第一個衝出嚟！我哋步伐算一致、好有默契，已經唔止係經理人同藝人關係咁簡單。」
恨拍兄弟作
提到圈中摯友，家輝不得不提「阿哥」張學友：「大家一直都認識嘅，但直至6、7年前喺朋友派對內傾偈，開始多咗聯絡。我細個睇佢嘅工作態度同待人接物，影響咗我好多。我哋都唔係日日通電話，但太耐冇消息嘅話，佢會搵我，我又會搵吓佢。（想同學友合作拍套兄弟作？）冇得強求，有機會梗係好啦。」
控制狂有發揮
家輝於《廉》片角色愛操控一切，被導演麥兆輝形容為「控制狂」，家輝感激對方給予空間自由發揮：「同合作過嘅其他導演唔同，麥導比較細緻，佢係文戲主導，任由我發揮之餘，佢亦有自己底線，所有嘢佢都有留意到，即使我嘅視線，佢都會提醒我。」