陳炳銓眼神搶戲搞到劉青雲「焗蟹」
舞台劇演員陳炳銓，在英皇電影《廉政風雲 煙幕》中飾演電召司機，與飾演廉署調查主任的劉青雲有對手戲，另一場是在廉署問話室等候戲份，雖然僅得兩場戲，但陳炳銓的演繹成為全片的唯一笑點，角色充滿喜感及亮眼，演技發揮之高，絕不遜於其無綫「視后」女友李佳芯！
爆笑出位
昨日他接受訪問時自言角色「戇居居」：「依家睇到個版本係見我喺CCTV度叫救命，其實原本唔係咁，只係寫我閂埋門叫救命，當時導演都話收貨，但過咗兩、三日Call我，叫我再拍個CCTV版本，之後出嚟個效果，好多觀眾都爆笑！」有機會演司機一角，陳炳銓覺得是一種恩賜，至於跟劉青雲對戲，他直認戰戰兢兢：「青雲係我偶像，雖然有啲寡言，但佢好Funny，當年做臨時演員時，曾經同佢合作另一套電影，依家多年重遇再合作，特別有感觸！」
拍戲時他與偶像一齊爆笑，更加記憶猶新：「我做佢司機，車中有場戲我哋對望，Take咗兩次，後來清晰講解就OK咗，之後大家睇Playback笑到飛起，青雲同我講佢都有焗蟹（忍笑）！（想演續集？）唔知有冇機會呀！」
