東東陪公主置裝即買即着
將於3月初首踏紅館舞台開演唱會的陳曉東，近日為準備個唱積極練舞，早前撇低在北京的老婆王妤嫻及兩個寶貝女兒陳芷霖（朵朵）和陳芷怡（多多）來港宣傳，期間曾開心形容為「甩鎖鏈」，享受自由空氣，但「偽單身」日子好快完，早前東東一家四口在銅鑼灣High Tea完再去血拼，見他變回廿四孝老竇帶囡囡專攻童裝，兩公婆雖有走入名牌羽絨店，但最終空手離開。
兩公婆空手而回
反而到童裝店後，兩個囡囡即時如電兔般周圍跑，東東和太太就像「御用造型師」般細心揀了一條「淑女Feel」的黑白裙，隨即東嫂就帶囡囡試身，兩姊妹走到鏡前照不停，似乎朵朵和多多好滿意這身淑女造型。而東嫂亦好慳家，為老公慳荷包而睇減價貨，反而東東冇計較，合眼緣就問老婆意見，兩個貪靚小公主就索性着住「戰利品」走，東東當然負責碌卡「埋單」！在商場逛了近45分鐘，最後只有小公主血拼成功，反而兩公婆未有斬獲。
