胡定欣「亂世」愛基仔起晒雞皮！
視后胡定欣瞓身為古巨基新歌MV擔任女主角後，近日再下一城獻聲，兩人一拍即合來首合唱版情歌，基仔大讚她的歌喉了得，連和音都親自上陣，定欣就自爆出盡力，聽完成品時更感動到雞皮都豎起。
古巨基的新歌《亂世情侶》推出兩星期，火速在網上平台得到過百萬點擊，為順應歌迷要求，遂找來MV女主角胡定欣來個合唱版，更特別安排在昨日情人節推出送驚喜，祝願世上所有情人能夠開花結果。
親自唱埋和音
兩人又趁浪漫佳節，在無綫節目《東張西望》合作整梳乎厘Pancake，最神奇是買回來隻隻蛋打出來也是雙黃，基仔說：「真係好事成雙，好正呀。」兩人雞手鴨腳，笑料百出，基仔笑定欣手勢「與眾不同」，不似Pancake似蠔仔餅，更笑說：「最好來個白飯一齊食！」
定欣坦言是在很短時間內決定合唱：「年廿九同基仔食飯，佢提起呢個合作，我又鍾意唱歌，咁咪試下囉。」基仔則對拍檔的歌喉極度讚賞：「佢真係唱得好好！錄音嗰日好快、好順利，佢唔止唱得好，勁到連和音都親自唱埋！」
定欣表示因拍攝MV時，對歌曲耳熟能詳，所以入錄音室幾乎不用睇歌詞：「好快已經代入歌曲嘅故事，投放晒感情落去，自己聽番段錄音，真係感動到起晒雞皮、毛管直豎，我盡咗力去做，希望大家鍾意！」
個唱嘉賓賣關子
提到4月在紅館舉行《古巨基「我們」世界巡迴演唱會香港站Part 2》，是否會邀定欣做嘉賓？基仔賣關子說：「到時再話畀大家知啦，或者我叫定欣嚟整梳乎厘Pancake煎蛋畀大家食都未定。」而早前宣布終極加開的最後一場，門票將於本月20日公開發售。