熊黛林「收工」唔追豬仔
去年誕下孖女的名模熊黛林（Lynn)，迎接農曆新年唔揸奶樽改揸毛筆寫揮春，創意十足畫三隻小豬，望豬年萬事如意。湊孖女搞到筋疲力盡，加上沒有傳宗接代的壓力，Lynn揚言任務已完成，不強求追仔！
Lynn於2016年升呢人妻下嫁富二代郭可頌，婚後火速「三年抱兩」於去年誕下可愛孖女，接受訪問時即席揮毫寫創意揮春的她，直言今個新年是最忙碌及最難忘，因是首年帶一對孖女去拜年，要一日走幾場，更笑言因自己不諳廚藝，故只負責指揮家傭去煮。對於在揮春畫上三隻小豬，原來她的願望並非想再生B，直言湊孖女已五勞七傷，加上夫家沒要求追仔以傳宗接代，故可以「收工」不用追「豬仔」！
她說：「佢哋半夜有咩事，我就要起身，一晚起幾次。（老公家人會唔會想追仔？）佢哋家族好大，男孫已經有好多個，冇呢方面壓力，同埋奶奶真係好好，依家錫我兩個女錫到燶，我任務完成咗。（有個仔美滿啲？）如果依家廿幾歲，我過幾年會再試吓，但我唔係廿幾歲，過幾年唔保證一定生得出。」
孖女喊得好可愛
已全面復工的Lynn，如遇上要離港太久的工作，索性選擇放棄：「BB係我全部，唔使做嘢時，有廿個鐘係畀佢哋，湊兩個係辛苦，搞到身體冇咁好，手又傷，腰又傷。（如果孖女扭計狂喊，你會好躁？）其實我係怪人，好鍾意佢哋喊，覺得喊時特別可愛，佢哋一喊我就會拍片，成日攞嚟重溫，唔知點解會咁，總之覺得佢哋喊得好得意，當然嗲起上嚟或者笑，都好窩心。」又指自己很幸運，有奶奶及媽媽幫手，故有時可抽空和老公二人世界撐枱腳減壓。
髮型：Chris@ilcolpo platinum
化妝：Ivan Lee
服裝：Whistles