單身食自己 小方有需求：好耐冇搞嘢！
歌手鄭中基（Ronald）前晚在紅館舉行第三場《鄭中基One More Time世界巡迴演唱會——香港站》，獲林家棟、余香凝與黃又南等藝人捧場。除了繼續三代同堂表演外，Ronald邀得《美女廚房》拍檔梁漢文（Edmond）及方力申（小方）擔任壓軸嘉賓，獻唱改編搞笑歌詞的Medley，還大放笑彈！Ronald問大家是否十年冇睇《美女廚房》，Edmond即說：「人哋最近有做喎！」小方加把口：「嗰個係假o架！」卻被Edmond寸爆：「你都癲癲哋，以前你話啲奶假，依家話節目假？」
搞電視台「T Viu B」
Ronald問觀眾是否想睇三人做一輯新節目，但笑言只能做《美男廚房》：「我哋已經有家室，唔可以亂咁食嘢。」小方「葡萄」說：「你哋兩個上晒岸，得我就Single（單身）！想當年唔係Single嗰陣就安分守己，今日Single就食自己。」Ronald搞Gag：「你想快啲溝到女就去投胎啦！」小方借機講有味笑話：「我真係好需要！好耐冇搞，真係好想搞……搞番個節目！」並表示要與TVB傾吓先，Ronald笑言現時有ViuTV，但Edmond指新一年要有大志：「應該直接搞個台出嚟，叫做『T Viu B』！」全場大笑！
另外，Ronald獻唱《想愛你》時突然甩嘴，即尷尬指要唱多次，不容許自己犯錯，全場拍手歡呼。
