古巨基趕造人老婆特訓「湊女」

將於4月再登紅館舞台的古巨基,今個新年決定放縱食欲過「肥年」!他自爆跟太太在公在私有着不同的角色扮演,更獲太太「培養」湊女經驗,希望一擊即中,趕及生豬B。

古巨基在豬年要「紅」運當頭,表演獅功,為4月11至13日的紅館演唱會舉行Part 2造勢!昨日傳來好消息,其三場個唱門票已爆滿,現宣布再開4月14日終極尾場。距離開騷還有兩個月,自認是「吃貨」的他決定新年盡情食咗先:「我係橡皮肚可以食好多嘢,如果唔係古太管住,我就係一個肥仔!估計今個新年會肥10磅。」

肖鼠的基仔結婚四年多,經常被催生B,古太直言鼠與豬好夾,基仔笑說:「同古太合作囉!」記者提醒他趕造豬B就要新年期間努力「開工」,他說:「係喎,醒唔起要懷胎添,盡力而為!」他自問與太太都不是怪獸家長,但古太直認「呢啡」,他爆料說:「你哋估唔到喺屋企我好似湊女咁,我諗佢特登,培養緊我湊女心得。」

「新五虎」團拜

工作上,古太擔當管束的角色,但回家後基仔就負責安撫對方,他說:「佢幫我好多工作嘅嘢,有時好多問題要解決,佢好緊張,我就要安撫佢,到咗依家呢個年紀,我EQ愈嚟愈好。」經過去年在舞台上跌落窿一役,令他有好大體會:「我學識珍惜身邊人,人生唔好咁多擔憂煩惱,好多嘢唔係計劃之中發生,能夠開心就開心。」他透露個唱Part 2會加入新曲目,亦造了超過一半新衫,希望觀眾睇得開心及有新鮮感。

另外,基仔趁新正頭與「新五虎」成員吳家樂、劉愷威及好友傅明憲拜年。昨日傅明憲在社交網分享照片,眾人在桃花前扮V面合照,笑得開懷。其中去年底與內地女星楊冪共同發聲明宣布離婚的劉愷威,不少網友十分關心他,指他可乘機行個桃花運!

化妝:NatalieSoo@ndnco

髮型:Mark Ip@hair salon

場地:六公館

道具:劉兆發金龍醒獅隊