張家輝林嘉欣High嗌萬歲
影帝張家輝、劉青雲及影后林嘉欣擔綱演出的英皇賀歲電影《廉政風雲 煙幕》「戲」勢強勁，繼初一首日開畫票房勢如破竹，以近400萬成為榜首後，截至昨晚10時為止，累積票房已有750萬，尚未計夜場在內，估計已可直衝800萬大關，可謂威到盡，可喜可賀！
忙於四出拜年的家輝獲悉喜訊後，表現相當雀 躍，除感謝觀眾支持，更出口術着該片「靈魂人物」萬歲，他說：「咁收得梗係要導演同老闆楊受成請食飯啦！」而年初一「包場」與家人率先入戲院捧場的嘉欣亦興奮狂呼：「恭喜發財！新年快樂！嘩！人生第一套電影上賀歲檔就有咁好成績，好犀利呀！一開畫已經係冠軍，恭喜晒所有台前幕後，講到好似自己攞獎咁，祝大家一齊(興)(興)合合去睇《廉》片啦！」昨日她更晒素顏吃Pancake慶祝相，就如她一樣甜到漏，她亦瞓身宣傳，不忘留言叫大家記得睇《廉》片！
麥兆輝多謝戲迷支持
對於成為華語片賀歲票房冠軍，導演麥兆輝昨日受訪時坦言超級開心：「好滿意！多謝香港人支持，當年《無間道》開畫220幾萬已經好開心，今次有咁嘅成績真係對得住觀眾，對得住老闆！之後仲有兩集，係《黑幕》、《內幕》，能力做到都想原班演員，希望完成到！」
而家輝前日與太太關詠荷帶13歲囡囡張童（Brittany）到粵劇名伶白雪仙家中拜年，Brittany長得亭亭玉立，擁有美人胚子，與媽咪餅印一樣。精神飽滿的白雪仙與陳寶珠、關錦鵬和資深傳媒人汪曼玲等歡聚。