方力申教水蝕得開心
藝人方力申（小方）昨日與前無綫新聞主播陳嘉倩出席慈善活動，小方透露新年會去北京探親：「公公同舅父喺嗰邊。（親戚會唔會催婚？）放棄咗啦！親戚嘅仔女都已經結婚同生小朋友，唔會再有心催我，因為佢哋要湊孫。」問到可有帶過女友一同探親？他避談：「過咗去嘅嘢唔好提啦！」
講到新一年工作大計，他希望游泳學校可以上軌道，做到收支平衡，又笑說：「呢度咁多小朋友，可以派吓卡片先，創業真係好難。」又坦言學校現時蝕錢：「依家係冬天，仲要有流感，簡直慘淡，不過我開咗未夠一年，依家係守業，但蝕都蝕得開心，因為可以令小朋友學識游水！（搵到你嘅接班人未？）有，小朋友跳落去唔驚水，好犀利。」