吳業坤台上換衫「借啲意」晒肌

歌手吳業坤昨日偕吳若希出席活動，提到4月的紅館演唱會，坤坤表示相隔兩年再在紅館開騷，一直做運動作準備，他笑說：「可能天資問題，只練到4舊腹肌，一直未練到6舊，想畀觀眾帶來蛻變感覺。（騷Body？）同監製研究過，就咁除衫會好夾硬嚟，可能喺台上換衫，喺劇集入面着住底褲已經係好大極限。唔同人有唔同要求，有啲人重口味，有啲人就聽歌，好似鄧小巧話如果我除衫就唔嚟！」