胡杏兒佗豬B：湊夠數開農場！
胡杏兒前年誕下兒子Brendan，昨日公布喜訊承認懷有第二胎，她坦言歡迎豬B加入大家庭，笑言湊夠人數開設農場！好友李施嬅、姚子羚和黃智雯紛紛送上祝福，並指定要做契媽。
藝人胡杏兒2015年與圈外男友李乘德拉埋天窗，前年誕下一子李奕霆（Brendan），早前她出席公開活動時明顯身形發福，散發孕味，昨日她終透過社交網公布懷上第二胎，並上載超聲波照及一張Brendan指着她肚子的相片，留言：「豬寶寶終於加入，李氏農場可以開張了。」其丈夫亦發文：「囝囝就快有新嘅玩伴。」
頻孕吐冇胃口
對於追B成功，肖羊的杏兒笑指加埋肖牛的老公及肖雞的Brendan，終於「湊夠開農場」，她受訪時：「真係好開心生到豬BB，上次佗住Brendan係開緊工，今次佗住BB又係拍緊劇，可能BB旺媽咪工作，想陪住我開工。今次2月尾就完成拍攝，所以還好，只係孕吐感覺比較強烈，成日冇乜胃口。」她表示拍完劇後會留港陪仔仔，又會繼續接一些應付得來的工作：「最緊要係BB健康同平安！多謝大家祝福。」
「叫佢生多幾個」
「胡說八道會」好姊妹當然興奮！李施嬅送上祝福說：「佢好叻，生仔、生女都好，因為佢個仔太得意，唔夠我哋咁多個契媽爭，叫佢生多幾個。我哋個個都未有得生，呢個任務交晒畀佢先。」姚子羚則表示：「開心呀！又多個可愛BB，睇吓爸爸媽媽鍾意仔定女先，我哋會逼杏兒畀我哋做多次契媽！」黃智雯則表示早已獲悉喜訊：「梗係戥佢開心，所以我哋全部都好開心，又做契媽喇！」