吳毅將撐亞視台慶：一定唔托手(月爭)
亞視去年宣布重啟，期間多次傳出「熄機」及裁員，不過昨晚於大埔總台舉行台慶一周年暨新春盆菜宴穩定軍心，身為老闆的鄧俊杰希望大眾給予時間做得更好，至於一班昔日藝人吳毅將、盧海鵬及宮雪花等畀面撐場，場面熱鬧。
《亞視迎新歲，好友慶團圓》昨晚於大埔總台舉行，筵開40圍盆菜宴與眾同樂，不少昔日員工畀面現身，令平日冷清清的總台變得熱鬧。見大堂悉心布置，除了於中央放置大電視播放亞視舊片外，兩旁亦掛上經典劇集海報，而盆菜宴門口則擺放廣告客戶攤位。亞洲電視控股董事會主席鄧俊杰上台致詞時表示，已接手亞視一周年，承認壓力甚大：「希望大家同傳媒畀時間我，喺我帶領下齊心協力做得更好。」
梁雪瑤準時出糧
視亞視為娘家的吳毅將偕老婆唐麗球赴會，他稱每次返總台都感觸良多：「我啱啱做完嘢返港過新年，點知亞視打畀我，咁一定要嚟。總之亞視要我呢個仔，我一定唔會托手(月爭)！」提到亞視負面新聞不絕，他說：「聽到一定心噏，所以如果要我幫手一定會幫。」而自居老臣子的夏春秋笑言：「我都經歷過幾個浪，都幾乎畀人裁走咗，都係我死(舌累)，(舌累)返轉頭囉。」
至於表演魔術的亞姐梁雪瑤透露，已練習了近兩星期，並說：「我工作正常，一直有工作安排畀我，又準時出糧。」並自爆近日與拍拖3年的男友分手。
另外，有份出席的戴夢夢，看見自己當童星的片段時表示：「當年喺廣播道拍到好眼瞓，媽咪孭我返屋企。」而亞視舊將弗烈、賴水清、李道洪等上台分享昔日拍攝點滴，吳毅將笑指弗烈是其師兄，惟外貌很乞人憎，笑爆全場。