加拿大天王Justin Bieber早年接連棄養寵物變「負皮王」，最近連其索模老婆Hailey Baldwin都出事！兩人婚後領養了摩天使小狗Oscar，不時分享「一家三口」溫馨場面，但Hailey前日上載與狗玩短片卻惹來爭議，皆因她當愛犬做公仔，捉着牠跳舞並不斷搖晃，並留言：「唔使擔心，佢好鍾意咁（口架）！」結果被大批網友鬧爆虐待動物，與老公「天生一對」，有人更爆粗留言：「你做乜X嘢？天啊你好冇腦。」又有人戥Oscar慘：「你點知佢鍾意畀你好似傀儡咁舞？你好殘忍！」但有粉絲撐Hailey未有傷害小狗，反指網友大驚小怪。