城城開騷喊住愛另一個女人
天王郭富城的太太方媛雖然有孕在身，但仍「夫唱婦隨」，無懼舟車勞頓過大海撐老公開騷。而台上的城城未有鳴謝愛妻，反而向另一位深愛的女人作「愛的呼喚」，除憑歌寄意外，更感觸到低頭嗚咽，喊住話會繼續愛她。
城城一連兩場的《舞林密碼世界巡迴演唱會》2019首站澳門站，前晚假澳門威尼斯人金光綜藝館舉行頭場，懷有第二胎約5個月的方媛未有留港休息，隨夫到澳門捧場，更大方在觀眾席露面，手揮螢光棒兼自拍短片與歌迷齊齊為城城打氣。她上次佗B肥肚不肥人，今次亦保持靚樣，面尖尖沒有半點大肚婆的肥腫。
已四年沒有踏足澳門舞台的城城，出盡200分力勁跳勁唱搞到身水身汗，唱到經典情歌《不老的情歌》時，表示現已為人父，深深體驗做父母的辛苦，自爆10歲時媽媽仍會背起他，有歌迷隨即「嘩」了一聲，他續說：「媽媽真係好錫我，我好開心依家有個幸福家庭，有個寶貝女，我可以從一而終努力工作，做好爸爸、好丈夫，呢刻……（嗚咽）人大咗，時間過得好快，媽媽身體唔好，我會更用心，用任何性質愛我媽媽，將呢首歌獻給我親愛嘅媽媽，祝佢身體健康。」
感激歌迷鼓勵
而城城的智能舞台首度移師澳門場地，特別是舞台能幻變成一列火車，又可在中段分開五段移動，震撼歌迷。唱《動起來》時，一萬觀眾揮動智能燈棒，城城以一粒種子來形容剛出道的自己，靠着多年歌迷給他的鼓勵和養分而成長為樹，100場巡迴才做了6站，所以會繼續Keep住狀態，最後以《唱這歌》為個唱畫上圓滿句號。
個唱結束後，城城受訪時談及媽媽的健康情況：「之前有啲擔心，但依家已經好番。我五兄弟姊妹，瞬間想到媽媽，睇住媽媽身體一路差，以前會嚟睇我演唱會，依家扶佢都可能冇精神，所以嗰一刻想到媽媽，冇媽媽冇我。」他透露於4月後才開工拍電影，所以可跟家人共度新歲。