阿Sa瞞婚賴嘢再嫁要收祝福
蔡卓妍（阿Sa）昨日出席電影謝票活動，獲觀眾大讚演技有力問鼎影后！她表示因聲帶問題會暫停歌唱事業，全力拍好電影，問到有否結婚計劃？她直言遲啲先算、不會衝動，至於會否像當年般瞞婚？她即說：「唔會，賴過一次嘢！」
阿Sa在英皇電影《非分熟女》中，被視為繼《雛妓》後又一挑戰自我的突破之作，其角色有性障礙症，更有大膽露背自摸及跳鋼管舞鏡頭！昨日她到旺角出席電影優先場謝票，跟觀眾傾偈及送禮物。對於被看好有力問鼎金像獎影后，她說：「如果每次拍戲都諗住攞獎，唔會係最自然狀態演出，順其自然啦！」講到電影成為今屆荷蘭亞洲電影節閉幕電影，她表示也希望抽時間出席。
跳鋼管舞爆腳趾甲
講到片中身穿性感舞衣跳鋼管舞，她表示角色是普通人，不用特別操Fit及練舞技：「但跳完發覺周身瘀晒，腳趾甲都爆埋，但跳嗰陣腎上腺素好高就唔覺痛。（有冇再繼續學？）冇呀！我都想。（再學跳畀男朋友睇，增加情趣？）唔使樣樣都向嗰方面諗，係種運動，會更加了解自己，對住塊鏡知道自己點樣最靚，係個勇敢大挑戰。」
日前她在訪問中表示若男友石恆聰想結婚，會作出配合，阿Sa澄清指目前狀態好開心：「下一秒會發生咩事冇人知，遲啲先算，個天會話畀你聽，總之唔會衝動。（會唔會好似當年咁瞞婚？）唔會，賴過一次嘢，係希望得到祝福。」強調未必會像「阿嬌」鍾欣潼般大搞婚禮。
聲帶出事停唱一年
至於她的聲帶出現問題，要暫停歌唱事業，她承認已困擾了一年，Twins巡唱也要暫停，未知何時可以再唱歌：「可能多年嚟一直用同一個位過勞，同埋上次香港站病住都死頂嘅後遺症，轉過幾個醫生，甚至叫我唔好講嘢，可能係上天畀啟示我，叫我呢一年專心拍戲。」