洪永城食陳瀅口水尾甜番補數

藝人洪永城與陳瀅於無綫劇集《黃金有罪》中飾演情侶，日前二人在觀塘一幢大廈的大堂拍攝，場口講述Tony使詐要陳瀅請食飯，最後陳瀅將食緊的珍寶珠塞入他口中，認真Sweet。

戲內夠甜蜜，戲外陳瀅卻自爆拍到受傷：「其中有一幕係戲中戲，我扮女殺手，講我好打得，拍出嚟效果好滿意，但因為要用手擋對方嘅拳頭，所以擋到手瘀。」她又指拍劇期間接連生病，感冒完又患腸胃炎再發燒，以致消瘦不少。

計劃新春見家長

至於Tony一樣掛彩，他透露之前拍一場被打戲時發生小意外：「對方要打我塊面，但時間夾得唔好，所以打到我個嘴唇爆缸。（女友有冇呵番？）冇，佢同我都忙做嘢，我連瞓覺時間都冇。」他預計會於農曆新年前拍畢該劇，將留港度歲，問他有否見過女友的父母？他說：「未。（新年去佢屋企拜年？）有機會當然會把握時機。」

否認同家樂拍拖

另外，陳瀅昨日出席慈善活動，早前傳她與藝人陳家樂拍劇拍出愛火花兼同遊日本，她說：「我係同幾個中學同學去日本，好早買咗勁平機票，知佢都係去日本，可能啲人見我哋社交平台都話去日本，以為我哋一齊，其實我去沖繩，佢去東京，大家冇見到。（同家樂係咪拍拖？）冇拍拖。（收兵？）點會？不嬲唔收兵。我哋之前合作，好多人都鍾意我哋呢Pair，希望Keep住個熱情，不過我哋戲內戲外都冇感情線。（家樂係咪追你？）冇，佢係好認真勤力嘅演員，初頭幾個月，私底下都冇乜交流。」

洪永城、陳瀅

陳瀅與洪永城一支珍寶珠兩份吮。