李佳芯搵「馬太」催桃花運

藝人馬國明及李佳芯昨晚到九龍塘出席賀年活動，席間馬國明談到過年習俗時表示：「我會圍住屋企棵桃花行幾百個圈，3歲就開始要桃花運嘞。」事後記者問蜜運中的馬國明是否還要「行桃花運」？他笑言：「梗係要啦，桃花代表人緣，況且我媽咪每年都買，做得呢行梗係想多啲人鍾意。」李佳芯聞言即謂：「畀你講到我都想開始擺桃花。（咁你要搵馬太幫手喎。）但我淨係得一個馬太嘅電話（指馬國明女友黃心穎）！」馬國明聞言秒回：「你講緊馬德鐘太太？」