朱敏瀚戒純情變「肌佬」

無綫藝人朱敏瀚出道以來多演鄰家男孩及細佬等角色，近日一改白淨斯文形象，突然操弗變大隻仔，除了練成胸肌及六塊腹肌外，膚色亦明顯較以往黝黑，添了成熟男人味。講到突變「肌男」，他透露是為了配合新劇《極度怪咖》角色需要：「今次個角色係拳手，劇情講我好打得，仲有幾場赤膊上陣嘅打拳戲。為咗出嚟效果好啲，專登操肌同曬燈，膚色仲黑到由以前6號粉底轉用9號！（想轉做打星？）呢次都算係我第一次拍打戲，自己亦好想趁呢次機會轉變，始終就快做咗10年細佬角色，希望畀多啲新鮮感觀眾，亦想嚟緊戲路更廣。」續指開劇前兩個月已開始戒口，並特別鳴謝藝人好友關梓陽擔任其健身教練。