張建聲冧招加碼 拖陳嘉莉買首飾

去年4月由張建聲（Justin）出Post，稱過去太專注事業而忽略女友，宣布分手！其後間中傳出復合消息，甚至出埠蜜遊，但雙方有默契地以「順其自然」及「有共識」回應！直至去年底，Justin再做主動宣布與Kelly愛火重燃，又發表「愛的宣言」揚言努力改變自己，自此轉玩高調，日前更放閃稱以100元玩遊戲贏得公仔氹女友！

「巡舖」試手鏈

本報日前發現二人到旺角做Gym，素顏的Kelly與Justin前後腳步出健身室，期間各自覆電話，未見交流，直至步出大廈才「糖黐豆」，風騷拖到實！行到首飾店前，Justin拉一拉女友手示意停低，在櫥窗前望兩望就拖女友入內挑選心頭好，在店內極速巡視一周便埋櫃枱試手鏈，見Kelly全程四萬咁口，有男友錫果然心情大好！

貌似「早有預謀」的Justin，以手勢向店員形容心水手鏈，並親自替女友戴上，但未知是否不合心水，二人逗留約10分鐘便轉移陣地，到體育用品店Shopping。Justin拎起多件運動衫拼到Kelly身上，又伸出「暖男之手」幫女友孭背囊，體貼又細心！未幾，Kelly一手拎住戰利品、一手拖住愛郎離開，等候過馬路時，二人肉緊攬腰又咬耳仔大笑，令現場瞬間充滿粉紅泡泡。

買首飾有幾開心？望吓Kelly個笑容就知！	張建聲親自幫女友戴手鏈，咁細心，即時加分！	張建聲、陳嘉莉

預告上門拜年

事後Kelly接受本報訪問，問何時正式復合？她只說：「多謝關心。（邊方做主動？）要問番佢喇！（分手後Justin傳過多段緋聞，有冇問佢？）哈哈，冇興趣知。」問是否視對方為結婚對象，她笑說：「順其自然，結婚呢啲唔強求。」當追問Justin是否想買首飾做「箍煲」禮物？她大笑說︰「咁啱行過睇吓啫！幫佢慳錢呀！」並自爆早已見家長，非常熟落，農曆新年亦會去男友家拜年。