古巨基包起25架小巴免費載客
古巨基「找數」宣布開演唱會Part 2，更豪花20萬元包25架紅Van造勢，今日免費請廣大市民搭順風車走勻港九新界，Gimmick十足又揼本！基仔又想請老友黃子華和古天樂擔任個唱嘉賓，呼籲全城集氣！
《古巨基－我們世界巡迴演唱會香港站PART 2》將於4月11及12日在紅館舉行，昨日有兩架車身貼滿演唱會海報及宣傳字句的紅Van「突襲」記者會，基仔從其中一架小巴跳車登場，繼而興奮地指要回饋市民：「平時喺酒店搞記者會起錶價都要10幾萬，但搞完場大龍鳳就冇咗，就諗吓有冇多少少意義，所以今次包咗25架小巴請大家乘搭，車上面仲有歌聽。」兩條免費紅Van路線分別是來往上環至荃灣（中午12時至晚上10時）及旺角至大埔（下午3時至凌晨1時）。
加闊通道防受傷
基仔指包車花費20萬元：「揀呢兩條路線盡量覆蓋港九新界，又要包車身，所以預算比起喺酒店舉行仲要高，但用得更有意義。」問到會否扮乘客上車玩Surprise兼高歌？他賣關子笑言有機會「亂入」：「私底下好耐冇搭過小巴，喺兩年前拍戲做小巴司機揸過。」
講到Part 2的不同之處，基仔透露歌單及製作會加入新元素，舞台亦有大改動，因去年開騷時不慎墮台受傷：「大家應該仲記憶猶新，上次想開多啲觀眾席，所以只係得一呎多嘅通道，今次就同公司講Cut一行觀眾席，加闊通道3呎，今次一定會加倍小心同提高警覺。」
採新措施售票
嘉賓方面，他亦早有目標人選：「想請黃子華，上次開騷撞正佢閉關準備棟篤笑，就唔搞佢。（已經請咗？）未開口(口架)！希望大家一齊集氣！」問可會請「我最喜愛的男歌手」古天樂，實行「雙古」同台？他笑言要先多謝對方幫手拍片宣傳個唱：「上次佢以『五虎』形式嚟，今次可能問吓佢可唔可以個人形式上台唱歌，攞咗獎就梗係要嚟我個演唱會。」並指門票今日公開發售，會採用政府的新措施：「第一日只係網上賣飛，第二日先可以喺門市售票處賣。」