張美妮知胎兒性別：新年先講
懷孕4個多月的藝人張美妮昨日接受電台訪問，見她肚皮隆起，但手腳依然纖幼。問到懷孕可有不適？她說：「呢個星期腰下面近屁股開始有啲痛，但好彩一次都未嘔過，不過有失眠，醫生話可能係賀爾蒙轉咗所以咁，但依家已經冇事。」
問到佗仔定女？她說：「其實係知道咗嘅，但想新年見到親戚朋友先講，畀個喜悅佢哋。」並透露預產期6月初，本想順產：「但啲朋友係咁嚇我，搞到我都有啲驚，所以遲啲再睇情況。」她又表示現時有接少少工作，笑言打算工作至分娩之前：「啲人話前二後八，不過我唔知到時情況點樣，老公都好緊張，成日叫我小心啲同行慢啲，同埋車出車入。」