曹永廉以下犯上 數張衞健缺點
於結局篇中「大帥哥」張衞健相當慘烈，既要坐監又要逃亡，搞到三位姨太楊秀惠、蔡思貝及譚凱琪於網上集氣，起哄搞「掌摑大行動」，洪永城今次真係「聽打」。「大帥哥」的軍師曹永廉亦激讚張衞健，指他唯一缺點是太認真。
無綫劇集《大帥哥》將於周五大結局，劇中「馬炭」洪永城奸到噴汁，觀眾看到咬牙切齒，戥「大帥哥」張衞健唔抵，而他身邊的三位女人當然要為其報仇！
驚到縮埋
前晚「艾妞」楊秀惠上載一張合照，見她與「沅婉」蔡思貝及「天嬌」譚凱琪圍住洪永城，更齊齊舉起手作勢摑他，搞到他驚到縮埋一舊。秀惠留言：「呢個Post加埋有5萬個Likes，佢就Live直播畀我哋掌摑，為大帥哥報仇！」之後洪永城轉發該相，寸爆回應：「我就覺得好難啦！」網民即幫三位「姨太」反擊，指他們人氣爆燈，更有人稱要叫齊身邊人畀Like，叫洪永城記得找數。
不止觀眾愛「大帥哥」，連劇中飾演其軍師的曹永廉亦大讚他，雖然兩人相識多年，但合作拍劇還是首次：「佢腦筋轉得好快，真係冇乜藝人好似佢咁犀利，佢幫自己度對白之餘，仲幫對手度埋，同佢拍劇有好多得着。佢好錫演員，每日都會買一大箱香蕉及零食慰勞大家，如果要數佢缺點，就只有太認真。」
蕭正楠做主動
阿廉又談到近年經常跟好兄弟蕭正楠合作拍劇及綜藝節目，不時互窒，觀眾非常受落，之前更得到「最受歡迎電視拍檔」獎，阿廉自言並非主動之人，全因對方主動出擊才造就這段友情：「佢每日都會傳短訊畀我，問我今日做乜呀？佢當我係哥哥咁，我又當佢係細佬。我哋都會鬧交，但鬧完又會肯同對方講對唔住。」