軒仔Kay開齋封優秀歌王歌后

張敬軒、謝安琪(Kay)昨晚在十大中文金曲頒獎禮繼續領風騷,齊齊開齋首奪「最優秀流行男/女歌手大獎」,兩人分別斷了陳奕迅、容祖兒十三、十四年連奪此獎的紀錄。據聞Kay不會出席無綫勁歌頒獎禮,已奪九個大獎的她,幾乎已肯定成為本年度女歌手的大贏家!

昨晚「第41屆十大中文金曲『用心.聽』音樂會」舉行,霆鋒以神秘嘉賓身份打頭陣,全場報以喝采聲。身穿皮褸紮了小辮的他孭住結他自彈自唱《光輝歲月》,其後更型爆掟皮褸高唱《青空》。他最後站在升降舞台表演結他Solo,並唱出經典作《潛龍勿用》,唱罷就掟結他Pick揮手走人。

Supper Moment衝出香港

而首奪「最優秀流行男歌手」的軒仔形容是豐收一年,多謝歌迷與他風雨同路,承諾會繼續做好音樂。而獲「最優秀流行女歌手」的Kay開心說:「第一次得呢個獎,好開心,今年係特別一年,因為之前休息咗好長嘅時間,我會懷住謙卑嘅心多謝大家,呢個獎係一個鼓勵,多謝大家咁愛惜我。」

樂隊Supper Moment(SM)憑一手包辦曲詞的《橙海》奪得「全球華人至尊金曲獎」,興奮表示:「冇諗過攞咁大嘅獎,呢個獎同我哋嘅目標好貼近,好想衝出香港喺其他地方獻唱。」表演時主音Sunny大搞氣氛說:「場內嚴禁肅靜,可以嘅話全場舉手。」全場即刻High爆。

達明一派獲「金針獎」

獲頒「金針獎」的殿堂級組合「達明一派」唱出連串金曲,全場歌手站立拍掌致敬!黃耀明指「達明一派」是土生土長的香港人,分別來自牛頭角及彩虹邨,不禁自嘲是「老坑」,經歷過香港的盛世及衰落,他說:「我哋一直以熟悉嘅廣東話唱出香港人嘅故事,希望大家守住廣東話……本來我想講幾句,但被人刪咗,依家到處都有禁忌同紅線,扼殺流行音樂及文化,係香港人同自己嘅恐懼。」

音樂會上亦有悼念盧凱彤環節,片中播出17歲時的她與哥哥PJ彈結他對唱的畫面,溫馨有愛。