最近蜜運的洪永城（Tony）昨日到屯門拍攝新劇，同場的蕭正楠笑言不急於要Tony介紹新歡：「都唔知呢個幾耐！」但Tony繼續放閃，揚言女友未看過他打籃球：「驚佢睇完會更加愛我！」

藝人蕭正楠（Edwin）、洪永城及何遠東到屯門拍攝TVB新劇《黃金有罪》，並以70年代打扮配合劇集時代背景，劇中Tony與Edwin大展籃球技，引得同場的鄧以婷、吳沚默及李松蔓（前名李天縱）拍掌歡呼。

Tony球技了得，他表示以前在新西蘭有代表地區出賽，問到運動型的女友梁諾妍可有見過他打波？他笑說：「未！睇咗驚佢會再愛我多啲！」Edwin聽完急急扮走。

問到除夕可有安排慶祝活動？Edwin指太太黃翠如提議炮製日式火鍋：「佢講完咪又係我煮！（預埋Tony？）可以，食剩啲嘢畀佢，或者留番啲骨，放喺門口叫佢拎。」問Tony拍拖後第一個除夕是否想二人世界？他說：「唔一定要兩個人，可以約朋友。（出街倒數？）又唔係特別有興趣喎！」此時Edwin說：「唔好淨係帶人返屋企，要帶佢見吓呢個世界嘛！」

Edwin表示戥Tony找到女友開心，並笑說：「希望佢認認真真，唔好辜負人哋，都好戥佢開心！大時大節唔使做孤兒仔，又唔使冤住啲朋友。（佢有冇晒女友啲相？）近期開始有，話佢女友成日跑步，好健康。」Tony即表示拍拖很低調，很少公開讚女友。Edwin再進擊說：「我哋都唔會刻意叫佢介紹，都唔知呢個幾耐……」Tony沒好氣地說：「我唔反駁喇！交畀時間，真實嘅行動會搞掂呢啲謠言！」