閻奕格怕醜 靠林德信做主動
音樂世家出身的閻奕格（Janice）於前晚Boxing Day在旺角麥花臣場館開騷，與歌迷歡度聖誕，家人專程來捧場。音樂會請來林德信（Alex）、泰國13歲小女孩Gail及陳欣健任嘉賓，Janice跟Alex在台上自爆兩人互不相識，合唱一曲後，Alex說：「前晚綵排先識我，唱咗一首歌，見咗15分鐘。」Janice即更正：「10分鐘咋！跟住就話See You Tomorrow。」Alex笑言每年聖誕節識吓新朋友。Janice繼去年演出舞台劇《風雲》後，透露明年6月將會在港上演舞台劇版《搭錯車》，並唱出經典主題曲《酒干倘賣無》。
讚不絕口 想再合作
完騷後，Janice表示好開心有這次音樂會，談到與Alex之前不認識，她說：「真係呀！我見到男仔唔識講嘢，所以綵排見到佢時，我係好尷尬嘅，好彩Alex喺台上面主動講嘢咋，唔係就Dead Air。（有冇畀佢吸引到？）佢真係幾靚仔喎，同埋佢唱歌好有魅力呀！（會唔會再合作？）想呀！都多謝主辦有呢個安排，等我多咗個合作嘅拍檔。」
過去一年她自覺轉變很多，學會善待自己，相信台下歌迷都感覺到，之前她絕對不敢在台上跳舞，但現在最緊要懂得「Have Fun」。大部分時間她身在台灣，已經有多年沒有在港過聖誕，她透露除夕應邀到曼谷出席倒數演出，若舉家到曼谷一齊迎接新年，相信都不錯。