張敬軒Eason攞頭彩各擸3獎

張敬軒、Eason、容祖兒、謝安琪（Kay）、周柏豪、江海迦（AGA）、鄭欣宜、王灝兒（JW）、李幸倪（Gin Lee）、陳柏宇（Jason）及衛蘭，昨日獲頒「優秀流行歌手大獎」（即「十優歌手」），Eason與祖兒已分別是第19年及18年成為「十優歌手」之一，不過兩人並未有現身領獎。而許廷鏗（Alfred）雖然憑《停半分鐘聽一闋歌》奪得「十大金曲獎」第七位，但卻與「十優」無緣。得獎數目方面，軒仔與Eason暫時領先成獎王，Kay、柏豪、AGA、Gin Lee及Jason則各得兩獎。

期望大滿貫

獲3獎的軒仔認為有所交代，但笑指有些只是勤工獎：「我好畀心機，仲有好好嘅團隊，好好彩遇到好歌同好同事。」至於可有信心得到大滿貫？他直認有期望，但覺得每個傳媒的機制也不同。提到暫時成績比男團MIRROR成員姜濤好，他說：「唔好咁講，搞到兩邊歌迷都唔開心，唔明點解今年將我同姜濤拉埋嚟講。」他指二人早前在另一頒獎禮鬥人氣，自嘲已一把年紀：「如果輸咗都雖敗猶榮，都做咗咁多年。見到後輩攞獎我好開心，長江後浪推前浪，有競爭先有進步。」

陳奕迅	謝安琪今年回歸樂壇即奪獎。	Gin Lee谷胸上陣，性感示人。

事隔兩年再參加頒獎禮的Kay晒腿現身，憑《一個女人和浴室》與Alfred同分「十大金曲獎」並列第七位，她表示今年會盡量抽時間出席所有頒獎禮。問到可會叫好友古天樂（古仔）出席？她笑言不會主動邀請：「佢今次參與首歌得到大家支持、投票，出唔出席交畀佢自己決定，但佢講過如果有需要都會抽時間配合。都知佢好忙，有幾部戲拍緊，要佢配合都好難。」

Kay對古仔起痰

問到對古仔唱Live可有信心？她自爆對他產生特別感情，對他做甚麼也有信心：「喺首歌入面佢好錫我，係絕世好老公，有時喺電影台見到佢啲戲都好有親切感，見到佢畀人打會好心痛。（同老公張繼聰比？）兩個一樣心痛，但阿聰咁大隻頂得嘅！」Kay指老公冇呷醋，更認為這段緣分幾好。